今日勁啦, 我係Starway預早買定入場劵, 我地連玩兩個主題館: 米田共和國樂園及愛來魔相4D館!! 聽落好似好誇張, 不過真係值得一去, 咁凍天氣係室內笑下都好~~ 上次去台北"便便館"太流啦, 今次韓國認真好多, 起碼一上條樓梯已經有不同屁聲夠晒驚喜! 再進入不關卡扮食物滾入胃部, 再迫入腸道, 最後滑出肛門, 有資料有聲音有攪笑有場景 :D 屎尿屁話題最吸引小學雞~~他成場笑到收唔到聲~~ 仁寺洞令人感覺好休閒, 馬路寬闊, 附近小店陸續開門, 仲記得上次黎時候幫襯綠色帳篷街頭小吃, 天寒地凍吃下一口熱食, 心情好激動~~而阿仔看見糖果店都非常激動, 1000won可以揀幾款糖果, 他話可以買手信送同學仔, 即時啟動Shopping mode, 真係大個仔啦~~ 終於問路下發現4D館就係眼前, 非常唔顯眼地窖位置... 不過地方非常大大大, 仲可以有locker放下背包及大褸, 輕輕擺pose去影相!! 我自己堅鐘意黑白畫場景, 我地忽然走進漫畫世界, 既平面又立體, 照片帶點超現實感覺... 下一站廣藏市場, 真係趕天黑前去走一趟, 聽聞是傳統阿朱媽市場, 非常地道的"大排檔", 大家坐在窄小凳上吃小食, 好鬼凍, 我想去食番條芝麻飯卷暖肚, 而阿仔竟然走去買支可樂。 夜晚逛了一條堅流的"玩具街", 再去東大門食飯, 誤打誤撞走入了八色烤肉, 發現全個套餐放到成檯都係, 只係等如尋晚叫一碟王妃家牛肉價錢, 係網站雖然好出名, 但對於唔係食肉獸的我覺得麻麻地, 八款都是豬肉, 真係想點?! 越食越濟... 救命... 最後由老公負責KO晒豬肉, 我都係去行下街吧!
0 Comments
韓國滑雪之旅係凌晨5點半出發, 真係4點幾天未光就彈起身, 的士去到機場先天光, 好癲呀=.=" 唔知係咪太早, Counter無人, 可以自己印行李Label再襟掣送走件行李, 自助寄行李都好過癮~~好快去仁川機場, 進入-1度氣溫, 不過阿仔仍然覺得食雪糕是常識吧! 再進入暖氣機場巴士, 唔好講笑即時非常眼訓, 不過我過左T-Mark車站, 全程打醒12分精神! 終於搵到Stay B Hotel, 外型似精品酒店, 一入房真係唔算大間, 好彩book三人房, 起碼每人有個床位~~而阿仔馬上睇中左窗口sofa打機位, 打番兩鋪機提神!! 4點幾尷尬時間好肚餓, 走左間忠武路小店想食個飯麵, 店主話石頭飯係烤肉時先可以配食, 大家一輪雞同鴨講溝通下, 他唯有照落單, Yeah!! 小食超多款式呀... 食飽左就去南山塔行下, 大家忘記左條路點上山, 加上地上溶凍好滑, 氣溫急降又大風, 堅想放棄唔去, 但老公果份堅持最終成功左, 搵到纜車站啦! 今晚Target係要掛上我地的"Family Love Lock" :D 最後搭番纜車去明洞, 剛剛好去到"王妃家"烤肉店, 我們點了兩份烤肉試下, 炭火下烤肉好juicy, 果然質素與眾不同! 阿仔話要再encore呢間, 可惜之後時間再食唔番Lu, 下次先啦~~落得明洞點可以唔掃街當宵夜, 阿仔買左煎餃子, 而我買左隻15,000 Won(HK$100)芝士龍蝦, 開頭睇錯左價錢以為5000 Won, 之後一咬真係好好味, 咁算啦, 哈哈!
來到旅程的最後一天, 我地早上特意去科教館, 由於上次去遊樂場時不能順道參觀, 變左安排今天再去, 平日完全唔多人, 買左票入場幾層可以任意參觀 除左特別的展館 - 便便展。輪規模比香港的大, 但唔夠名古屋吸引, 好多感覺很舊, 沒有翻新, 只偶然攪特別展覽黎掠水, 而正正阿仔好想入"便便展", 門口已經超吸引, 成個吹氣冒險樂園一樣, 點會無細路想入去呀, 結果又要付上百幾蚊入場費, 同阿仔入去look look~~ 便便展其實幾有趣, 小朋友邊玩邊學, 當我地人類覺得便便無咩用時, 原來兔仔自己食番自己PoPo去吸食營養, 而某動物PoPo竟然再造用品, 天下之大無其不有, 老公無入展館, 他悠閒左一個小時再集合, 係時候準備回酒店等車啦!
七日台北宜蘭之旅又完結了... 下次唔知幾時再黎台北... 來到台北的第六日, 我地去參觀台北市立動物園+貓空, 搭捷運動物園站即到, 真係好方便, 聽聞園裡無餐廳, 一定買晒麵包入去充饑, 攪到我好心急入七仔掃定幾個麵包, 以防萬一... 動物園真係好大, 不過一入去已經見到有間老麥, 有無攪錯?! 跟Map行左一陣, 阿仔忽然發晒皮四喊, 唔知他肚餓定天氣太熱, 我地去老麥坐低醫肚, 他竟然一啖唔肯食 0_0 我同老公好激氣, 唔知仲行唔行好, 結果無理他照行熊貓館, 透心涼的冷氣簡直唔想出番去, 阿仔終於醒番有反應, 抖左一陣再出發, 有時唔明點解咁大個仔仲好似3歲咁, 可以狂喊而唔講發生咩事=.=" 下半場我雙腳都投降, 因為穿上無印布鞋關係, 頂唔住行斜路, 有持續抽筋情況, 輪到我行到發脾四, 尤其仲係搵唔到邊度可以搭貓空, 唔知仲要行幾遠 >_< 好彩係指示唔太清楚下都搵到個上客站, thanks god! 係又餓又累下完成貓空之旅, 老實講無咩特別咯! 回想動物園有一幕真係堅驚, 當我地經過黑猩猩館, 見到隻黑猩猩擰轉頭發現左我地, 再慢慢步近, 最後好似衝埋黎時, 我即時大叫彈開, 雖然明知道有塊玻璃隔住, 唔知感覺好迫真 T_T 回到台北車站時好肚餓, 馬上去Cafe醫肚, 下午茶cut單前叫左公司三文治+鬆化可口的格仔餅, 再黎杯咖啡充電, yummy~~返左蚊型酒店抖抖, 夜晚再出動去西門町掃街~~不負眾望, 等左半小時食到豪大大雞排!
告別了宜蘭包車哥哥, 回台北相對行程無咁緊湊, 今天先去台北兒童新樂園, 有少少荔園feel, 平平地可以玩大半日, 中午飯亦大件夾抵食, 園內亦唔多人, 可以輕輕鬆鬆hea玩~~ 最後忍唔住買左悠遊卡, 雖然唔係話台北留好多日, 不過下下搵散子搭車都煩, 悠遊卡亦可以留番下次用~~好多公仔選擇, 好靚呵! 真係要重申一次台灣真係無野好買! 百貨公司全部名牌專櫃, 完全無mood, 大家行到好熱又累, 阿仔開始發脾氣, 而老公想搵到書中提及cafe, 最後決定求其入一間坐低抖下, 最正梗係想去主題cafe坐下, 不過旅行用輕鬆心情去享受, 先真正花得其所。 夜晚去夏慕尼一嘗美味鐵板燒, 同事極力推介台北必去餐廳, 我覺得HK$250一位鐵板燒唔算貴, 何況阿仔仲可以免費食添, 真係好Good!! 場裡格調優雅, 怪不得Full House, 一位廚師都同時服侍12位客人, 每人叫menu略有不同, 好考功夫。飯後會安排客人到另一邊廂坐下, 感覺有如VIP, 慢慢歎飯後甜品及咖啡~~非香港可以用HK$500享受的服務水準!
晨早起床又歎左一個令人治癒的早餐, 阿仔又同同屋小朋友玩一陣滑梯, 我地準備要check out離開米妞, 真係有點捨不得... 我代阿仔講... 第一站先去蜡藝彩繪館, 了解蜡筆製作及DIY活動, 網上說可以足夠玩上半天, 而我地只有一個小時時間 :P 交左入場費之後可以玩四關, 第一關真係easy到爆係用蜡筆油顏色, 阿仔反眼大叫唔係呀?! 我心諗"賴野, 呢度唔通俾BB玩"~~好彩第二關似d樣, 可以自己裝嵌水筆, 先用綿芯吸好墨水, 再用"隨"仔Tum入膠筆筒, 過程真係幾過癮, 阿仔又要整埋我果份, 玩到唔夠喉添~~ 第三關就去小工場自製蜡筆, 先揀好一個模再揀好顏色交俾工作人員, 等待加壓加熱後定形, 阿仔好專心望住整個過程, 另外又可以製作台灣島形蜡筆, 結果我地三個人可以帶走六塊紀念品 :D 不捨得用呵~ 最後一關可以用水彩手臂上畫不同圖案, 畫咩好先, 有好多sample可以照跟, 我畫左一隻小甲蟲, 簡單鮮明, 阿仔和老公畫比卡超和Poke Ball, 由於高下立見, 阿仔一出門口即刻話要洗左圖案 =.=" 其實使咩咁認真呢?! 下一站去奇麗灣珍奶館, 台灣珍奶飲得多, 自己整又未試過, 珍奶館果然環境優美, 趕去課室上堂, 老師非常Cool, 講得又快, 先用奶精及茶包弄好奶茶, 原來珍珠唔可以加冰, 因為粉團會馬上變硬唔QQ, 所以泡奶茶加冰再Chok一輪完成後, 即時又撈起冰塊, 最後才加入QQ珍珠, 阿仔話好正好好飲! 順手book埋餐廳歎個半自助餐, 每人點了一個餐, 而前菜甜品可以隨意自助品嚐, 沙律水果款式很多, 跟餐送來的燈泡奶茶好趣緻, 岩岩先整完三大杯珍奶, 真係飲唔落燈泡, 但好想打包燈泡走...very cute...整體食物一般, 環境確實好舒服好hea。 食完中午飯, 馬上出發去平溪放天燈, 由宜蘭落去台北狂落雨, 心諗如果放唔到天燈點算?! 話晒都係今次旅行的重頭戲, 兜左兩個小時山路, 頭好暈腳好痺, 終於可以落車~~阿仔臉青口唇白好肚痛, 衝入天燈店裡借廁所, 好彩James同天燈店主相熟, 佔用人家廁所半小時... 借完廁所, 寫好心願係店內徘徊等雨停, 忽然好似拍生死時速一樣, 一停雨店主帶著我地三個人衝上去路軌, 再九秒九叫我地埋位拍照, 馬上點燈放上天, 望著願望飛上去一刻, 心情豁然開朗 :D 再自拍幾張相之後, 火車快要出現, 所有放天燈遊客一窩蜂散去, 火車一走, 又一窩蜂跳出路軌繼續點燈自拍, 場面好攪笑...Anyway好感恩可以成功放天燈, 大家今年有運行! 順便去埋九份, 好可惜商業味過重, 已失去往日情懷...食過傳統阿婆魚丸, 買左少少手信, 已經唔想再行... 去到台中Check in M Hotel, 完全一百倍俾騙感覺, 唔明網上評價咁好, 24小時Snack Bar搵笨到爆, 三人住房容不下兩個行李, 洗手間最誇張, 只夠一個人入去, 擦牙時唔可以關門, 因為太細啦!! 頂多只可以話地點方便搭捷運, that's it! 夜晚約了表妹台灣一聚, 選錯了地方, 吃得不爽, 整晚聽著她一個人留台灣工作的辛酸史, 仍然覺得回香港打工比較好~~
完全係一個Good Morning! 成晚都訓得好好, 一覺到天光, 眼前一片田園, 再落客廳住客都準備整早餐, 主菜由米妞民宿主人準備, 而多士咖啡就自己DIY, 所以客廳旁有個廚房頗大, 咖啡機有不同選擇, 令人意外係竟然有打泡機, 頓時覺得手上咖啡upgrade晒 :D 雪櫃亦有火腿可以放上麵包入爐, 悠閒地享受早餐才出發~~呢種心靈上滿足很難係香港找到~~ 首先我地出發去清水地熱, 完全昨天新加入地點, 同事上星期去過清水地熱和DIY蔥油餅話幾有趣, 我好貪心想兩個地方都去晒, 不過由民宿去要一個小時先到, 我考慮取捨問題, 但James卻努力將兩個地方加入行程, 話難得來宜蘭, 想去的都盡載我地去! 我覺得他是一位敬業精神的司機。 清水地熱其實是座落一個偏僻山區, 當年開闢後發現了石油太少, 但又掘出地下熱水, 於是變成了旅遊區, 有唔少local人一家大細黎野餐, 即煮即食溫泉蛋和粟米, 由於我地時間緊迫, 體驗溫泉"滾下滾下"之後, 就要上車稍後再吃, 而阿仔竟然再次可以浸溫泉水, 一洗之前頹樣~~事實又証明宜蘭人真係好鐘意浸腳=.=" 下一站去整三星蔥油餅, 完全唔知農場地址, 不過James好熟咯, 到達後負責人帶我地去整蔥油餅, 稍後再落田摘蔥, 剛好有一團人又黎整餅, 所以忽然好爆場 0_0 蔥油餅DIY真係好玩, 由麵粉弄薄又弄圓後加入三星蔥, 再圈成條狀變成蛇餅, 再有姐姐幫手煎烘成脆口的蔥油餅; 同時我地落濕漉漉田地去體驗摘蔥, 當水鞋有半隻完全俾"食"左入泥地時, 前面小朋友開始爆喊, 引發一連串哭叫聲, 計而跳上三星蔥上避難, 場面令講解員措手不及; 而我忙著盡量唔好俾自己"食"得太深, 不時要輪流抽起左右腳... 當一口咬落蔥油餅時, 真係萬分感動, 好好味呵! 中午預約了Amaze兔子迷宮咖啡餐廳, 網站說是一家親子餐廳, 山上風景亦很美, 眼前都是一片草地, 的確令人很舒服, 好岩細B跑來跑去吹下泡泡悠遊半天, 對於阿仔大哥哥有點悶, 最重要既係食物一般, 沒有太大驚喜。 包車真好, 悶了又去下一個地方 - 積木博物館, 預約了3點鐘買飛, 果然不用排隊, 可以歎歎冷氣參觀一下展品, 展館不大但有不少展品, 成為宜蘭必去景點。按問卷逐一找答案, 順便拍拍照, 我最鐘意發光的展區。入場劵又包了工作坊及飲品, 可以整Lego飲管及鎖匙扣留念, 真係抵晒~~ 下一站趕去幾米公園, 丟噹噹森林和中山國小溜滑梯, 幾米公園睇相好似好正, 實情真係得幾隻公仔, 算點?! 丟噹噹森林仲離譜, 得一條火車裝飾係頂, 影佢又影唔到人, 之後無野睇, 絕對唔可以稱之為森林, 亦唔係公園, 火車下只有一堆市集東西, 只好呆等James車我地去中山國小 =.=" 小學開放俾外人黎溜滑梯真係第一次聽, 石滑梯速度感OK, 網友話太細小朋友可能會滾埋一邊受傷, 阿仔似乎無呢個問題 :D James見仲有時間仲帶我地去左牧場, 餵小羊及小豬, 我第一次用奶樽去餵動物, 飲得超快, 阿仔話要餵多一支, 因為唔夠分喎~~早知早d黎呢個牧場玩好過去咩幾米公園! 終於去開餐, 由James介紹一間懷舊餐廳食宜蘭菜, 餐廳佈置得好有特色, 侍應安排了一個"唱片室"俾我們, 自成一角好有貴賓的感覺, 哈哈! 隨便點了幾個小菜, 感受一下懷舊的情懷~~食物水準不錯, 怪不得非常爆場~~ James幫我地call定的士返民宿, 是晚跟米妞協議了轉去小畫家房間, 雖然比小樹屋細左少少, 不過三個人住已經好夠大(比起台北酒店), 而價格上又抵番, 所以轉換下都無所謂~~醒起仲有清水地熱食品可以當宵夜, 忍唔住又去沖咖啡了, 仲開始識拉下花 :>
台北第二天食左個超難吃的早餐, 約好了包車司機James直上宜蘭, James高大而幾好禮貌, 之前係Whatsapp溝通了這三天行程, 他建議我地去伯朗咖啡城堡看看, 說是拍照好地方, 我想大概宜蘭無咩觀光地點, 連咖啡店都要去埋~~好彩宜蘭天氣好好, 陽光普照, 咖啡店係鏡頭下一下子變成城堡 :P 阿仔又歎埋雪糕之後, 我地去樂屋日本料理食lunch, 網上介紹魚生好正, 去到真身係一間地道小店, 似乎好多人黎食新鮮烤魚, 而我地點左魚生拚盤, 樂屋豆腐, 可樂餅, 握壽司, 果然魚生入口好鮮味, 手握壽司口感好正, 真想叫多一份, 不過怕又食唔晒! 飯後去左好搵笨的四圍堡車站, 以為有哈利波特影下, 點知變左羊咩咩, James話因為怕俾人告侵權所以轉左theme, 唔係起時候應該諗左呢個問題咩?! Anyway其實只是一間賣麵包餐廳的地方, 真係去過廁所可以上番車... 下一個節目係礁溪溫泉公園泡溫泉魚, 我見Google Map溫泉公園好大, 點知James叫我地路邊泡溫泉魚, 不用跑入公園, 價錢還包了抹腳布, 所以我地二話不說就放雙腳落去, 好快聽到阿仔狂喊聲, 好似受到魚類攻擊喊到好慘痛 =.=" 我覺得還可以, 有少少野被啄下啄下感覺, 不過我雙眼唔幾敢望堆魚食自己, 心諗點解宜蘭人咁鐘意"俾魚咬"?! 泡左一陣拎雙腳上黎望下, 真係白左又滑左, 死皮都無晒, Woo好神奇!! 即刻又放番入魚池繼續"去皮" :D 最後去公園對面仲有條手信街入埋貨先上車。 雙腳爽YY後下一站係去橘之鄉蜜餞, 可以DIY蜜餞回香港, 一個小小地方吸引了不少遊客購物, 而我地飛快入去報名DIY蜜餞, 好彩呢間唔使預約, 過程好簡單, 把每一粒蜜餞由一個筒壓入去, 目的令蜜餞劃開十字圖案, 更易令果肉入味, 阿仔最鐘意呢個動作, 仲"硬"幫我整埋=.=" 再加入沙糖和鹽, 用手不停翻動筒子裡蜜餞, 調味料變為水狀即可, 其實真係手都軟埋~~不過見到製成品又好開心 :D 行程超豐富, 再去亞典蛋糕+窯烤山寨村, 兩個地方係係隔離, 主要都是買遠近馳名亞典蛋糕, 同事形容到一試難忘, 所以入左幾條送禮自用; 而窯烤山寨村是一間食店+購物地方, 主要黎影下紅色妖怪, 買下手信, 到此一遊......去到呢個時候其實真係有d累, 好想返去欣賞一下米妞溜滑梯民宿 :P 果然一入屋, 阿仔嘩左一聲, 馬上跑去滑梯, 環境好清新舒服, 好有渡假心情, 怪不得得到網友激讚。隔壁走來一位女士幫忙check-in和提供大門密碼, 方便我地自由外出, 最痛苦既事係搬行李上3樓, 我地O咀之後, 老公打從心底流汗... 再打開小樹屋房間, 哇, 一間房大過我間屋... 唔知點樣跑來一對瘋狂小姊弟, 爬上小樹屋玩, 三個人跑來跑去, 原來我們間房係米妞民宿中最大最好玩, 所以三唔識七都要玩下, 瞬間只聽到小朋友尖叫聲。 包車James亦收工前把我地送去羅東夜市, 阿仔十萬個唔想出去, 只想玩民宿滑梯, 後來見夜市有遊戲玩, 即刻又坐低彈珠, 我地隨便夜市找東西吃, 三星蔥油餅一大條龍去排下, 串燒不可能錯過吧, 脆皮雞蛋糕外型都好攪笑, 似一個個小蛋攤, 又買來試試, 聽講包心粉圓是宜蘭特產, 最後跑入店試試, 清甜可口~~
阿仔催我地買一串串小吃就趕回民宿, 好像民宿中他已變成了大哥哥, 他想等小朋友回來一齊玩大堂火車滑梯, 當然逃不了做好功課先可以落樓玩啦~~ 半年前買下台北機票訂好宜蘭民宿, Copy晒同學仔一半行程, 準備復活假離港散心, 呢個Hea遊前沒有太大幻想和興奮, 行程不算緊密, 諗番的確係一個好決定, 年頭升左職之後壓力好大, 好需要出走一下... 搭中午HK Airline依舊無飛機餐食, 所以一到機係桃園機場food court醫肚, 食左個唔可以叫做西餐既Lunch =.=" 不過真係好想讚下洗手間, 非常乾爽又香噴噴, 最攪笑有部機可以俾廁客評分, 真係有要求架! 打的士去西門町Go Sleep, 撞鬼搵極都唔見酒店門口, 原來係一棟大廈內9/F先係Check in大堂 0_0 上網訂時完全無為意, 大堂好有去唱K feel, counter拎條key去房間, 幸好一打開都覺得物超所值, 房屋寬敞有景觀, 仲有兩張雙人床, 樓下已經係誠品, 非常方便~~ 是晚閒逛西門町, 去了日藥本鋪博物館, 一入去似去日本藥房, 不過價錢貴幾倍, 購買慾即刻下降... 唯有影下相, 估唔到佈景好有懷舊特色, 仲似模似樣 :D 之後開始落大雨, 我們入了一間雞排麵小店, 避雨兼醫肚, 老公對外脆內Juicy雞排讚不絕口, 跟住出去掃街買左即炸魷魚, 好得驚NT$100(HK$26)係成隻上, 食都唔食... 阿仔再堅持買珍珠奶茶飲, NT$50(HK$13)一大杯, 依家order珍珠奶茶可以"冰的", 亦可以"溫的", 甜度亦可以要求, 有個chart指俾店員知道, 阿仔說得一口流利普通話點左"溫的"珍珠奶茶~~ 再加上戰利品龍貓一大隻, 他非常心滿意足~~ 竟然係呢個時間發現左一間遊戲中心, 我同阿仔衝上跑車練番一轉, 唔知叫咩"寶寶世界", 不過似大人機鋪多d, 我唱左NT$100都可以玩一晚, 認真抵! 黑仔事件簿: 我對PaperPlane敵不過台北雨水, 無啦啦鞋底爛左入水, 攪到我夜晚10:30落街買波鞋, 但台北物價太貴, 有咩可能我會買對千五蚊波鞋, 結果上左去誠品無印, 人家關門前我揀左對半波鞋半布鞋物體, 頂住先啦! 減左價都成三百蚊架!
最後一天行程得番我地三人行, 原本我們去西崎親水公園, 不過覺得太花時間再去機場, 於是改變去奧武山公園, 點知就巧遇Anson Family, 真係約都無咁橋! 阿仔瘋狂跑去同Anson溜滑梯, 好天到暈早上, 完全感覺唔到颱風影響, 終於可以搵人影到大合照 :D 一張好難得旅行合照! 玩到11點真係要分別啦, 依依不捨, 我們去埋Outlet就還車去機場, Anson Family繼續旅程...嗚嗚...谷友個個話Outlet好流無野買, 頂多Gap比較抵, 於是一入去即殺入Gap, 試左一輪, 老公去行Adidas, 又發現Levis好抵, 買二送一優惠, 難抗拒3000yen牛仔褲誘惑, 發覺完全唔夠時間Shopping *_* 天呀! 早知尋晚唔去新都心啦~~我仲想行下Tory Burch T_T 行Outlet時, Levi門口有個好低B吹氣彈床, 阿仔照殺衝去彈下, 之後他坐Levi門口等我地時玩Minecraft, 隔離日本仔同樣打緊機, 兩個溝通唔到下都可以交流, 而我地趕急殺貨, 再去食個Quick Lunch...Outlet唔多餐廳選擇, 我地去食沖繩麵餐, 每次都跟一小碗炒飯, 非常飽肚, 環境一流, 可惜無時間欣賞, 又急急腳去還車... 還了租車後, 我們直接去機場, 正式告別了沖繩, 好唔捨得呵! 天氣好, 行程又岩小朋友, 大人可以舒服悠閒駕車周圍去, 真係一次好好的旅遊體驗 :)
|
Travel旅行令心身更健康! |
我的网站 | ✈ travel ✈ |